Milliy matbuot markazida O‘zbekiston milliy metrologiya instituti (O‘zMMI) rahbariyati ishtirokida matbuot anjumani bo‘lib o‘tdi. Unda o‘tgan yilgi natijalar va 2026-yilga mo‘ljallangan strategik rejalar e’lon qilindi. Tadbirda ta’kidlanishicha, Metrologiya to‘g‘risidagi qonun JST talablariga moslashtirilishi natijasida O‘zbekiston Global sifat infratuzilmasi indeksida (GQII) 18 pog‘onaga yuqorilab, 184 ta davlat orasida 72-o‘rinni egalladi. Anjuman davomida institut olimlari tomonidan ishlab chiqarish uchun yaratilgan yangi innovatsion qurilmalar — suv hisoblagichlarini qiyoslash uskunasi va barometrlarni tekshirish moslamalari namoyish etildi. Shuningdek, TRIS axborot tizimi orqali 8 turdagi metrologik xizmatlar to‘liq elektron shaklga o‘tkazilgani ma’lum qilindi.
O’zbekiston Respublikasi Prezidentining joriy yil 16-fevraldagi PF-25-sonli farmoni ijrosi doirasida tizimda quyidagi o‘zgarishlar kutilmoqda:
19 ta yangi yuqori aniqlikdagi davlat etalonlari xarid qilinadi;
Milliy kalibrlash va o‘lchash imkoniyatlari 2,5 barobarga oshiriladi;
Eskirgan qiyoslash tizimidan xalqaro verifikatsiya va kalibrlash tizimiga bosqichma-bosqich o‘tiladi;
Xorijiy OTMlar bilan kadrlar tayyorlash bo‘yicha qo‘shma dasturlar yo‘lga qo‘yiladi.
Ushbu islohotlar mahalliy mahsulotlarning xalqaro bozorlarda tan olinishini ta’minlash va o‘lchashlar aniqligini jahon standartlari darajasiga ko‘tarishga xizmat qiladi.