2026-yil aprel–may oylarida Osiyo davlatlari o‘rtasida gender tenglikni ta’minlash va xotin-qizlarning jamiyat hayotidagi ishtirokini kengaytirish masalalarini muhokama qilishga bag‘ishlangan 2-Osiyo xotin-qizlari xalqaro forumini o‘tkazish rejalashtirilmoqda. Ushbu nufuzli anjuman mintaqada gender siyosati, xotin-qizlarning huquq va imkoniyatlarini kengaytirish hamda ularning iqtisodiy va ijtimoiy faolligini oshirish masalalari bo‘yicha muhim xalqaro muloqot maydoniga aylanishi kutilmoqda. Forumni tashkil etish va uning mazmun-mohiyatini boyitish jarayonida Agentlik xotin-qizlari ham faol ishtirok etishi nazarda tutilmoqda. Mazkur tashabbus Shavkat Mirziyoyev tomonidan “United Nations”ning “78th Session of the United Nations General Assembly”da ilgari surilgan takliflarga hamohang ravishda amalga oshirilmoqda.
![]() |
Mazkur forumning ilk yig‘ilishi 2024-yil 13–14-may kunlari Samarqand shahrida “Xotin-qizlarning iqtisodiy, ijtimoiy va siyosiy huquq hamda imkoniyatlarini kengaytirishga oid mintaqaviy yondashuvlar” mavzusida bo‘lib o‘tgan edi. Unda xalqaro tashkilotlar va moliyaviy institutlar ishtirokida xotin-qizlar huquqlarini ta’minlash, ularni qo‘llab-quvvatlash va ijtimoiy himoya qilish sohasidagi zamonaviy yondashuvlar muhokama qilindi. Shuningdek, xotin-qizlar va bolalarga nisbatan zo‘ravonlikning barcha shakllarini bartaraf etishda mintaqaviy hamkorlikning ahamiyati, uning mamlakatlar ijtimoiy-iqtisodiy taraqqiyotiga salbiy ta’sirini kamaytirishga qaratilgan profilaktik chora-tadbirlar hamda nodavlat tashkilotlarning xotin-qizlar huquqlarini himoya qilishdagi ilg‘or tajribasi va innovatsion yondashuvlari kabi masalalar keng muhokama qilingan. Forumda 30 dan ortiq davlat va xalqaro tashkilotlardan delegatsiyalar ishtirok etib, Sharqiy, Janubi-Sharqiy va Janubiy Osiyo hamda Markaziy Osiyo mamlakatlaridan parlament a’zolari, davlat organlari vakillari, diplomatik missiyalar hamda xalqaro tashkilotlardan 40 dan ziyod mutaxassislar O‘zbekistonda gender tenglikni ta’minlash sohasida amalga oshirilayotgan islohotlarni yuqori baholagan.
Forum davomida mamlakatda xotin-qizlar manfaatlarini himoya qilish, gender tenglikni ta’minlash va oila institutini mustahkamlash davlat siyosatining ustuvor yo‘nalishlaridan biri ekani alohida ta’kidlangan. So‘nggi yillarda xalqaro standartlarga muvofiq milliy qonunchilik bazasi shakllantirilib, gender tenglikni ta’minlashga qaratilgan qator qonunlar qabul qilindi va 2030-yilga qadar mo‘ljallangan gender strategiyasi amalga oshirilmoqda. Shu bilan birga, normativ-huquqiy hujjatlarni gender ekspertizadan o‘tkazish, genderga asoslangan byudjetlashtirish va gender audit kabi zamonaviy mexanizmlar amaliyotga joriy etilmoqda. Forum yakunida iqtisodiy, siyosiy va ijtimoiy sohalarda xotin-qizlarning faolligini oshirish, mehnat bozorida teng imkoniyatlarni ta’minlash va ayollar tadbirkorligini rivojlantirishga qaratilgan takliflar umumlashtirilib, muzokaralar natijasi sifatida mintaqada gender tenglikni yanada mustahkamlashga qaratilgan Samarqand deklaratsiyasi qabul qilingan.
