O‘zbekiston Respublikasi Prezidentining 2026 yil 16 fevraldagi PF-25-sonli Farmoni — “Texnik jihatdan tartibga solish sohasidagi islohotlarni ilg‘or xalqaro amaliyot asosida jadallashtirish chora-tadbirlari to‘g‘risida”gi hujjat mazmun-mohiyatiga bag‘ishlangan keng qamrovli seminar bo‘lib o‘tdi.
Mazkur tadbir ochiq muloqot shaklida tashkil etilib, unda ishlab chiqarish korxonalari va tadbirkorlik sub’yektlari vakillari faol ishtirok etdilar. Seminar doirasida texnik jihatdan tartibga solish tizimini takomillashtirish, xalqaro standartlar bilan uyg‘unlashtirish, mahsulot va xizmatlar sifatini oshirish hamda raqobatbardoshlikni kuchaytirishga qaratilgan dolzarb masalalar atroflicha muhokama qilindi.
Tadbirda O‘zMMI DM Chirchiq filiali rahbari N.Raxmatillayev, “O‘zbekiston akkreditatsiya markazi” DM direktori o‘rinbosari N.Ochilov, Texnik jihatdan tartibga solish agentligi boshqarma boshlig‘i S. Qosimov hamda Markazning sifat bo‘yicha bosh menejeri B. Gʻafurov va ushbu tashkilotlar xodimlari ishtirok etdilar. Ular ishtirokchilarga qabul qilingan farmonning asosiy yo‘nalishlari, uning amaliy ahamiyati hamda tadbirkorlik sub’yektlari faoliyatidagi o‘rni haqida batafsil ma’lumot berdilar.
Shuningdek, uchrashuv davomida Toshkent viloyatining Chirchiq shahrida faoliyat yuritayotgan tadbirkorlar bilan suhbatlashilib, ularning muammo va takliflari tinglandi. Mutaxassislar tomonidan akkreditatsiya jarayonlari, muvofiqlikni baholash, standartlashtirish hamda metrologiya sohalarida yuzaga kelayotgan savollarga atroflicha javoblar berildi.
Mazkur seminar tadbirkorlar va sohaviy tashkilotlar o‘rtasida samarali muloqotni yo‘lga qo‘yish, normativ-huquqiy hujjatlarning mazmun-mohiyatini keng jamoatchilikka yetkazish hamda amaliyotda uchrayotgan muammolarni bartaraf etishda muhim ahamiyat kasb etdi.